АЛМАТЫДА БОЛАШАҚ ТЕХНОЛОГИЯЛАРЫН ДАМЫТУ ОРТАЛЫҒЫ АШЫЛАДЫ
Сеул қаласында Қазақстан мен Корея Республикасы арасында «AI SilkNet» атты Ғылыми-технологиялық форсайт және предиктивті аналитика орталығын құру жөнінде келісімге қол қойылды. Бұл жоба Қазақстанға Оңтүстік Кореяда ұлттық ғылым мен технологияның басым бағыттарын айқындауда тиімділігін дәлелдеген заманауи әдістемелер мен тәжірибелерді қолдануға мүмкіндік береді.
Сонымен қатар, Қазақстан Республикасы Президенті жанындағы Ұлттық ғылым академиясы (ҰҒА) мен Азиядағы суперкомпьютерлік және аналитикалық технологиялар саласында көшбасшы саналатын Корея ғылыми және техникалық ақпарат институты (KISTI) ғылым, технология және жасанды интеллект салаларында стратегиялық әріптестік орнату туралы келісімге келді.
Жасалған уағдаластықтар Қазақстан мен Корея Республикасы арасындағы ғылыми-технологиялық ынтымақтастықтың жаңа кезеңін ашады және «AI SilkNet» орталығын құруды көздейді. Орталықтың негізгі мақсаты — Қазақстанның зияткерлік әлеуетін Оңтүстік Кореяның жасанды интеллект, үлкен деректер және сценарийлік модельдеу салаларындағы озық технологияларымен біріктіру.
Практикалық тұрғыдан алғанда, KISTI жүйелері негізінде Қазақстанда ұлттық предиктивті аналитика және форсайт жүйесі құрылмақ. Бұл жүйе ғылым мен технологияның даму үрдістерін болжауға, ұлттық басымдықтарды айқындауға және стратегиялық шешімдерді мемлекеттік әрі корпоративтік деңгейде қабылдауға жол ашады.
Қазіргі таңда жасанды интеллект стратегиялық ойлаудың маңызды құралына айналуда. Қазақстан үшін бұл — реактивті басқарудан проактивті басқару үлгісіне көшу деген сөз. Яғни, болжамдар мен сценарийлер мемлекеттік саясаттың маңызды бөлігіне айналады.
Орталықтың қызметі бірыңғай цифрлық платформа мен ғылыми жарияланымдар, патенттер және технологиялар жөніндегі деректер базасын қалыптастыруға, форсайт-зерттеулерге арналған аналитикалық құралдар әзірлеуге, білім және тәжірибе алмасуға, кадрлар даярлауға бағытталады. Сондай-ақ AI-экожүйесін дамыту, зерттеушілер мен бизнесті қолдау, жасанды интеллектті экономика, экология және денсаулық сақтау салаларында пайдалану көзделген.
Орталық Алматы қаласында, Ұлттық ғылым академиясының базасында орналасады. Басқару жүйесі ҰҒА мен KISTI бірлескен атқарушы комитеті арқылы жүзеге асырылады. Басқару паритет және өзара тәжірибе алмасу қағидаттарына негізделеді, ал жетекшілік ету міндеті кезекпен Қазақстан мен Корея тараптарының өкілдеріне беріледі. KISTI сараптамалық қолдау көрсетіп, деректерді өңдеу мен технологиялық болжау құралдарын жетілдіруге көмектеседі.
Алдағы уақытта «AI SilkNet» орталығының тәжірибесі Орталық Азия елдеріне таралып, деректерге негізделген болжам және шешім қабылдау бағытында өңірлік желі құрылады.
— Біз KISTI президенті доктор Сик Лидің қолдауын жоғары бағалаймыз және «AI SilkNet» орталығы ғылым мен технологияның елдерді ортақ мақсаттар мен болашақ жолында біріктіре алатынын дәлелдейтін жарқын үлгі боларына сенімдіміз, — деді ҚР Президенті жанындағы Ұлттық ғылым академиясының президенті А. Құрышбаев келісімге қол қою рәсімі барысында.
Бұл ынтымақтастық ғылым, білім және экономика салаларында жаңа мүмкіндіктер ашып, өңірдің тұрақты дамуына негіз қалайды және ғылым мен технологияның елдерді ортақ болашақ жолында біріктіре алатынын көрсетеді.
Дереккөз: Kazpravda.kz
