KazNARU-да «Гүлденген Қытай» Қытай тілі орталығы ашылды

2025 жылғы 10 қазан күні Қазақ ұлттық аграрлық зерттеу университетінің (KazNARU) Агро-технологиялық хабында жаңа «Гүлденген Қытай» Қытай тілі орталығының салтанатты ашылу рәсімі өтті.

Орталық Қытай Халық Республикасының Алматы қаласындағы Бас консулдығының және қытайлық Beida Zhihui Co. компаниясының қолдауымен ашылды. Бұл жоба екі ел арасындағы білім, ғылым және мәдениет салаларындағы ынтымақтастықты нығайтуға бағытталған маңызды бастама болып табылады.

Іс-шараға құрметті қонақтар, университеттің профессор-оқытушылар құрамы және қытай тілін үйренуге қызығушылық танытқан студенттер қатысты.

Қытай тілі орталығының басты мақсаты — KazNARU студенттері мен оқытушыларына қытай тілін меңгеруге кең мүмкіндік беру, сондай-ақ Қазақстан мен Қытай арасындағы мәдени байланыстарды тереңдетіп, өзара түсіністікті арттыру. Орталық аясында тілдік курстар, мәдени іс-шаралар, ғылыми конференциялар және академиялық алмасу бағдарламалары ұйымдастырылмақ.

Іс-шараны KazNARU Басқарма Төрағасы – Ректоры А. Қ. Күрішбаев ашып, жаңа орталықтың іске қосылуын университеттің халықаралық серіктестікті дамытудың жаңа кезеңі деп атап өтті.

Сонымен қатар, Қазақ-қытай зерттеу орталығының атқарушы директоры орталықтың мақсаттары мен алдағы жоспарларымен бөлісті. Қонақтар жаңа орталықтың мүмкіндіктерімен, соның ішінде интенсивті тіл курстары, мәдени жобалар және халықаралық тағылымдамалар бағыттарымен танысты.

Жоба Қытай Халық Республикасының Бас консулдығы, Beida Zhihui Co. және Pengbo Academy Kazakhstan Campus ұйымдарының белсенді қолдауының арқасында жүзеге асты.

Қытай тарапынан жобаны іске асыруға атсалысқан мамандар:

• профессор Тянь Ин — атқарушы директор;

• профессор Доу Сяовэй — академиялық бағыт бойынша директор;

• ассистент-оқытушы У Юйсюань.

KazNARU тарапынан зор үлес қосқан мамандар:
К. Е. Сұлтанғазиев, Д. Иманмади, А. Ш. Ералиева, Г. Е. Алпысбаева, Р. Ф. Абазов және А. А. Абдраманов. Олардың белсенді еңбегі мен жанашырлығы іс-шара барысында ерекше атап өтілді.

«Гүлденген Қытай» орталығы тек тіл үйрету орны ғана емес, Қытай мен Қазақстан арасындағы мәдени және білім көпіріне айналуды мақсат етеді. Алдағы уақытта орталық аясында қытай тілі олимпиадалары, мәдени күндер, ғылыми конференциялар және студенттік алмасу бағдарламалары ұйымдастырылмақ. Лента қию рәсімінен кейін қатысушылар естелік суретке түсіп, бейресми жағдайда пікір алмасып, жаңа жобалар мен бірлескен бастамалар жөнінде талқылады.

KazNARU ұжымы бұл орталықтың ашылуы екі ел арасындағы достық пен өзара түсіністікті нығайтып, жастардың халықаралық деңгейде дамуына жаңа мүмкіндіктер ашатынына сенімді.

KazNARU Баспасөз қызметі