МАЛАЙЗИЯЛЫҚ СТУДЕНТТЕР ЕКІ ДИПЛОМДЫҚ БАҒДАРЛАМА АЯСЫНДА ӨНДІРІСТІК ПРАКТИКАДАН ӨТУДЕ

Малайзияның Паханг университетінен екі дипломдық бағдарлама аясында KazNARU-ға келген студенттер Өсімдіктер биологиясы және биотехнологиясы институтында өндірістік практикадан өтуде. Болашақ биотехнологтер зертханалық тәжірибелер жүргізіп, биологиялық материалдарды зерттеу және ғылыми нәтижелерді талдау әдістерін меңгеруде.

Практика 2026 жылғы 19 қазаннан 6 қарашаға дейін Қазақстан Республикасы Ғылым және жоғары білім министрлігі Ғылым комитетіне қарасты институт базасында өтеді. Оған 6B05102 – «Биотехнология» білім беру бағдарламасының төртінші курс студенттері қатысуда. Практикаға KazNARU-дың «Зооинженерия және биотехнология» кафедрасының аға оқытушысы Фатима Сағымбек жетекшілік етеді.

Студенттер институт зертханаларының ғылыми бағыттарымен танысып, эксперименттік жұмыстың негізгі кезеңдерін игеруде. Тәжірибені жоспарлаудан бастап алынған деректерді өңдеу мен қорытындылауға дейінгі жұмыстар теориялық білімдерін нақты зерттеу міндеттерімен байланыстыруға мүмкіндік береді. Зертханалық қауіпсіздік талаптарын сақтау да практикалық дайындықтың маңызды бөлігіне айналған.

Екі дипломдық бағдарлама аясындағы мұндай дайындық білім алушылардың халықаралық білім беру тәжірибесін Қазақстанның ғылыми ортасындағы зертханалық жұмыспен толықтырады. Студенттер үшін бұл – кәсіби дағдыларын жетілдіріп, биотехнология саласындағы болашақ зерттеулеріне негіз қалыптастыратын кезең.