АЛМАТЫ ҚАЛАСЫ ӘКІМІНІҢ ОРЫНБАСАРЫ KAZNARU-ДЫҢ ИНФРАҚҰРЫЛЫМДЫҚ ЖӘНЕ ҒЫЛЫМИ ӘЛЕУЕТІМЕН ТАНЫСТЫ

2025 жылғы 31 қазан күні Қазақ ұлттық аграрлық зерттеу университетіне (KazNARU) Алматы қаласы әкімінің орынбасары Нүкенов Абзал Нүкенұлы жұмыс барысымен келіп, университеттің инфрақұрылымдық нысандарымен, материалдық-техникалық базасымен, оқу және жатақхана жағдайымен, сондай-ақ ғылыми-инновациялық бағыттағы жаңа бастамаларымен танысты.

Университеттің Басқарма төрағасы – Ректоры, ҚР ҰҒА Президенті Күрішбаев Ақылбек Қажығұлұлының бастамасымен «Қазақ-Строй» ЖШС-мен ынтымақтастық шарт негізінде 9 қабатты 450 орындық жаңа жатақхана құрылысы аятқалуға жақын. Мұнда студенттер үшін Медициналық орталық тұрғызылатын болады.

Басқарма Төрағасы-Ректордың Бірінші орынбасары Ибрагимов Пірімқұл Шопанқұлұлы KazNARU – өз студенттерін 100 пайыз жатақханамен қамтамасыз еткен Алматыдағы жалғыз университет екенін атап өтіп, соңғы 3 жылда оқу сапасы артты, цифрлық университет құрылды, материалдық-техникалық база нығайғандығы туралы айтты. Оқу-зертханалық ғимараттары мен студенттік жатақханаларда күрделі жөндеу жүргізіліп, студенттердің мәселелерін шұғыл шешу үшін университет базасында жатақханаға орналастыру бойынша Ахуалдық орталық жұмыс істейтінін, оған онлайн өтініш беруге мүмкіндік жасалғанын кеңінен таныстырды.

Кездесуге Басқарма Төрағасы-Ректордың орынбасары Сұлтанғазиев Қуат Елеусізұлы, Халықаралық қатынастар және стратегиялық даму жөніндегі проректоры Абазов Рафис Фанисович, сондай-ақ Ғылыми-білім беру технологиялық платформасының атқарушы директоры Фараби Ермеков, «Су ресурстары және IT-технологиялары» факультетінің деканы Арыстанов Мейрам Буранұлы және Жастар ісі жөніндегі басқарма бастығы Әшірәлі Сманов қатысты.

Сонымен қатар, Су ресурстарын басқару және Небраска-Линкольн университетімен (АҚШ) бірлескен Extension орталықтарының жұмыстарымен танысып, жатақханаларды аралап, университет студенттерімен кездесті.

KazNARU Баспасөз қызметі