«ТАШКЕНТ ИРРИГАЦИЯ ЖӘНЕ АУЫЛ ШАРУАШЫЛЫҒЫН МЕХАНИКАЛАНДЫРУ ИНЖЕНЕРЛЕРІ ИНСТИТУТЫ» ҰЛТТЫҚ ЗЕРТТЕУ УНИВЕРСИТЕТІ ӨЗІНІҢ 90 ЖЫЛДЫҚ МЕРЕЙТОЙЫН САЛТАНАТТЫ ТҮРДЕ АТАП ӨТТІ
2025 жылғы 09 сәуірде «Ташкент ирригация және ауыл шаруашылығын механикаландыру инженерлері институты» ҰЗУ өзінің 90 жылдық мерейтойын атап өтті. Бұл — өңірдегі ең көне әрі беделді ауыл шаруашылық, техникалық жоғары оқу орны тарихындағы өте маңызды оқиға.
1935 жылы негізі қаланған ТИИАШМИ мамандандырылған инженерлік институттан бастап, бүгінгі таңда халықаралық академиялық қауымдастықта лайықты мойындалған, Орталық Азиядағы жетекші ғылыми-білім беру орталығына дейінгі тамаша даму жолынан өтті.
Мерейтой аясында «Жаһандану жағдайындағы мамандандырылған жоғары білім мен ғылымды дамыту: мәселелер мен мүмкіндіктер» тақырыбында халықаралық ғылыми конференция өткізілді.
Конференция жұмысына Еуропа, Азия, Таяу Шығыс және ТМД елдерін қоса алғанда, әлемнің 30 елінен келген 500-ден астам ғылыми-білім беру мекемелерінің, мемлекеттік құрылымдардың, халықаралық ұйымдардың, дипломатиялық корпустың және іскер топтардың өкілдері қатысты.
Конференция инженерлік және аграрлық білім беру, ғылыми тәсілдерді трансформациялау және жаһандану жағдайындағы орнықты даму салаларындағы өзекті мәселелерді талқылау мен тәжірибе алмасуға арналған маңызды халықаралық алаңға айналды.
Мерейтойдың ашылу салтанатында құттықтау сөз сөйлеген Қазақстан Республикасының Өзбекстан Республикасындағы Төтенше және Өкілетті Елшісі Бейбіт Атамқұлов екі ел арасындағы білім, ғылым және инженерлік кадрларды даярлау салаларындағы көпжылдық серіктестіктің стратегиялық маңыздылығын атап өтті. Сондай-ақ ол ТИИАШМИ-дің өңірлік академиялық кеңістікті дамытуға қосқан үлесін ерекше атап өтті.
Қазақстан Республикасының Ғылым және жоғары білім министрі Саясат Нұрбек пен ҚР Ұлттық ғылым академиясының Президенті, KazNARU Басқарма төрағасы - Ректоры, академик Ақылбек Қажығұлұлы Күрішбаевтың атынан конференция қатысушыларына құттықтау сөзді Қазақ ұлттық аграрлық зерттеу университеті Басқарма Төрағасы-Ректордың бірінші орынбасары, профессор Пірімқұл Ибрагимов жеткізді.
Мерейтой аясында экология және тұрақты даму мәселелеріне ерекше назар аударылды. «Жасыл аймақ» халықаралық бастамасы аясында ТИИАШМИ кампусы аумағында ағаш отырғызу салтанатты рәсімі өтті. Іс-шараға шетел мемлекеттерінің елшілері, ресми делегациялар, халықаралық ұйымдардың өкілдері, студенттер мен оқытушылар қатысты. Елшілер паркі — мемлекетаралық ынтымақтастықтың, бейбітшіліктің және қоршаған ортаны қорғау жөніндегі ортақ жауапкершіліктің тірі символы ретінде құрылған маңызды жоба болды. Бұл бастама университеттің экологиялық сананы тәрбиелеу мен халықаралық өзара іс-қимыл арқылы экологиялық болашаққа ұмтылысын айқын көрсетті.
ТИИАШМИ-дің 90 жылдығы — тек қорытынды жасау емес, сонымен қатар жаңа ғылыми жаңалықтарға, білім беру бастамаларына және халықаралық әріптестікті нығайтуға серпін беретін айтулы оқиға болды.
Бүгінде ТИИАШМИ ирригация, мелиорация, гидротехника және ауыл шаруашылығын механикаландыру салаларында жоғары білікті инженерлік және ғылыми кадрларды даярлайтын маңызды білім орталығы ретінде жан-жақты дамуын жалғастыруда.
Университеттің профессорлық-оқытушылық құрамын, студенттерін, түлектерін, серіктестерін және достарын осы айтулы мерейтоймен шын жүректен құттықтаймыз!
Алдағы уақытта да университеттің жетістіктері, ғылыми жаңалықтары және халықаралық табыстары жаңа биіктерге жетіп, аграрлық ғылымның орнықты дамуы мен өркендеуі жолында жалғаса берсін!
KazNARU Баспасөз қызметі
