KazNARU ERASMUS+ EDUFUSION ХАЛЫҚАРАЛЫҚ КЕЗДЕСУІНДЕ ИННОВАЦИЯЛЫҚ ШЕШІМДЕРДІ ҰСЫНДЫ

2026 жылғы 13–15 қазанда Қазақ ұлттық аграрлық зерттеу университетінің (KazNARU) делегациясы Португалия мен Испанияда өткен Erasmus+ бағдарламасының Edu-Fusion Network for Sustainable Growth (EduFusion NSG) халықаралық жобасы консорциумының кездесуіне қатысты.

Жұмыс отырыстары Порту жоғары инженерлік институты (ISEP) мен Виго университетінде ұйымдастырылды. Еуропа және Қазақстан жоғары оқу орындарының өкілдері жобаның аралық нәтижелерін, білім сапасын қамтамасыз ету, оқытудың инновациялық әдістерін енгізу және халықаралық ынтымақтастықты одан әрі дамыту мәселелерін талқылады.

Кездесу барысында KazNARU Жасыл және орнықты даму институтының директоры Рафис Абазов EduFusion цифрлық порталының тұжырымдамасы мен жасанды интеллект технологияларына негізделген интеллектуалды шешімдерді таныстырды. Бұл бастамалар университеттердің жұмыс берушілермен байланысын нығайтуға, студенттерге кәсіби бағдар беру жүйесін жетілдіруге және түлектердің мансаптық дамуын қолдауға бағытталған.

«Инженерлік технологиялар» факультетінің деканы Ләззат Әлдібаева білім беру үдерісіне интеллектуалды технологияларды енгізу және оқытуды білім алушылардың жеке қажеттіліктеріне бейімдеу мәселелеріне тоқталды. Ол Erasmus+ EduFusion жобасына қатысу инженерлік білім беру бағдарламаларын жаңғыртуға, халықаралық тәжірибе алмасуға және мамандар даярлау сапасын арттыруға мүмкіндік беретінін атап өтті.

Сонымен қатар қатысушылар STEAM-білім беруді, цифрлық құзыреттерді және инклюзивті білім беру ортасын дамытуға, жоғары оқу орындары мен нақты экономика секторы арасындағы байланысты нығайтуға ерекше назар аударды.

KazNARU-дың халықаралық консорциумға қатысуы озық білім беру тәжірибелерін енгізуге, бірлескен бастамаларды дамытуға және инновациялар мен орнықты даму бағытында еуропалық университеттермен ынтымақтастықты кеңейтуге ықпал етеді.